سکون قلب پاتا ہوں درِ جعفر مظفر پر
مقدر کو جگاتا ہوں درِ جعفر مظفر پر
زمیں سجدے میں رہتی ہے فلک تعظیم کرتا ہے
سدا منظر یہ پاتا ہوں درِ جعفر مظفر پر
محبت بول اُٹھتی ہے عقیدت رقص کرتی ہے
میں جب نغمے سناتا ہوں درِ جعفر مظفر پر
یہاں نظریں جھکی سب کی یہاں پلکیں بچھی سب کی
میں اپنا سر جھکاتا ہوں درِ جعفر مظفر پر
جہاں سے کرب مٹتا ہے جہاں دل جگمگاتا ہے
میں وہ منظر بھی پاتا ہوں درِ جعفر مظفر پر
بشارت دی تھی آقا نے یہ دونوں شیر آئیں گے
میں اس جلوے کو پاتا ہوں درِ جعفر مظفر پر
شہیدوں کے لہو سے خاک پٹن کی مہک اٹھی
میں وہ خوشبو بھی پاتا ہوں درِ جعفر مظفر پر
وفا کی داستانوں سے زمیں پٹن کی شاہد ہے
میں یہ منظر دکھاتا ہوں درِ جعفر مظفر پر
یہ کم عمری کے شہزادے مگر جرأت کا کیا کہنا
یہ افسانہ سناتا ہوں درِ جعفر مظفر پر
یہاں سے قادری نسبت مجھے ملتی ہے تحفے میں
میں یہ اعزاز پاتا ہوں درِ جعفر مظفر پر
یہ وہ در ہے جو آقا کے درِ اقدس سے جُڑتا ہے
میں ہر نسبت بڑھاتا ہوں درِ جعفر مظفر پر
مجھے جب مدح کہنی ہو علی کے پیارے بیٹے کی
قصیدے میں سجاتا ہوں درِ جعفر مظفر پر
یہی در ہے جہاں ولیوں کا آنا جانا رہتا ہے
میں خود محسوس کرتا ہوں درِ جعفر مظفر پر
یہی وہ در ہے جس پر خواب ڈھلتے ہیں حقیقت میں
میں قسمت کو جگاتا ہوں درِ جعفر مظفر پر
عطا کی شان تو دیکھو مرے دامن کو بھرتے ہیں
میں تو کچھ بھی نہ کہتا ہوں درِ جعفر مظفر پر
یہاں سنتے ہیں سب دل کی زبانوں کی نہیں پروا
میں دل سے بات کرتا ہوں درِ جعفر مظفر پر
یہاں سب بول اُٹھتے ہیں "علی کا فیض جاری ہے"
میں یہ نعرہ لگاتا ہوں درِ جعفر مظفر پر
مرے جعفر سے نسبت کی عطا کتنی نرالی ہے
میں جو چاہوں وہ پاتا ہوں درِ جعفر مظفر پر
امینِ قادری ہوں میں فقیر عشقِ سید کا
میں جیتا ہوں کہ مرتا ہوں درِ جعفر مظفر پر
کلام
عبدالامین برکاتی
احمدآباد گجرات
No comments:
Post a Comment